راولپنڈی — پاکستانی اسپنر آصف آفریدی نے اپنے کیریئر کے پہلے ہی ٹیسٹ میچ میں وہ کارنامہ انجام دے دیا جو تقریباً ایک صدی سے کوئی نہیں کر سکا تھا۔

جنوبی افریقہ کے خلاف پنڈی ٹیسٹ میں ڈیبیو کرنے والے بائیں ہاتھ کے اسپنر نے 5 وکٹیں حاصل کر کے 92 سال پرانا عالمی ریکارڈ توڑ دیا۔

آصف آفریدی، جن کی عمر میچ کے آغاز پر 38 سال 299 دن تھی، ڈیبیو پر پانچ وکٹیں لینے والے دنیا کے معمر ترین بولر بن گئے۔

اس سے قبل یہ اعزاز انگلینڈ کے چارلس میریٹ کے پاس تھا، جنہوں نے 1933 میں 37 سال اور 332 دن کی عمر میں ڈیبیو کے موقع پر 5 وکٹیں حاصل کی تھیں۔

کرکٹ ماہرین کا کہنا ہے کہ آصف آفریدی کا یہ کارنامہ ثابت کرتا ہے کہ عمر تجربے کو جنم دیتی ہے، اور جنون کبھی پرانا نہیں ہوتا۔