سربراہ پاک فضائیہ ایئرچیف مارشل ظہیر احمد بابر سدھو رومانیہ کے سرکاری دورے پر پہنچ گئے، جہاں انہوں نے میزبان چیف آف ائیر اسٹاف لیفٹیننٹ جنرل لیونارڈ گیبریل سے ملاقات کی۔ ملاقات میں دونوں ممالک نے دفاعی تعلقات کو مزید مضبوط کرنے اور مشترکہ فضائی مشقوں کے انعقاد پر تبادلہ خیال کیا۔
رومانیہ ائیر فورس ہیڈکوارٹرز پہنچنے پر ائیر چیف کو گارڈ آف آنر پیش کیا گیا۔ ملاقات کے دوران آپریشنل تعاون، تربیت، عملے کے تبادلے اور خطے کی سیکیورٹی صورتحال پر بھی بات چیت ہوئی۔
آئی ایس پی آر کے مطابق یہ دورہ پاک اور رومانیہ کے درمیان عسکری تعلقات کو مستحکم کرنے میں ایک اہم سنگ میل ثابت ہوگا، جبکہ دونوں ممالک نے دفاعی اور صنعتی شعبوں میں تعاون بڑھانے پر اتفاق کیا۔
