واشنگٹن: امریکی وزیرِ خارجہ مارکو روبیو نے کہا ہے کہ امریکا پاکستان کے ساتھ اپنے تعلقات کو نئے اسٹریٹجک مرحلے میں داخل کرنے کا خواہاں ہے۔ ان کے مطابق اسلام آباد کے ساتھ تعاون میں اضافہ واشنگٹن کی جنوبی ایشیا پالیسی کا اہم حصہ ہے۔ ہفتہ وار پریس بریفنگ میں گفتگو کرتے ہوئے مارکو روبیو نے کہا کہ امریکا پاکستان کے ساتھ تعلقات کو ’’مشترکہ مفادات‘‘ کی بنیاد پر وسعت دینا چاہتا ہے، جن میں انسدادِ دہشت گردی، علاقائی استحکام اور معاشی تعاون کے شعبے نمایاں ہیں۔ ایک سوال کے جواب میں، جب ان سے پوچھا گیا کہ آیا بھارت نے پاکستان اور امریکا کے بڑھتے ہوئے تعلقات پر کوئی اعتراض کیا ہے، تو انہوں نے کہا کہ: “ایسا کچھ نہیں ہوا۔ بھارت کے خدشات اپنی نوعیت کے ہیں، لیکن امریکا اپنے قومی مفاد کے تحت تمام ممالک کے ساتھ متوازن تعلقات رکھتا ہے۔” مارکو روبیو نے مزید کہا کہ پاکستان کے ساتھ واشنگٹن کے تعلقات کسی تیسرے ملک کے نقصان پر مبنی نہیں بلکہ خطے میں امن اور ترقی کے لیے مشترکہ کوششوں کا تسلسل ہیں۔ انہوں نے اس بات کا بھی اعتراف کیا کہ دونوں ممالک کے درمیان ماضی میں اختلافات ضرور رہے ہیں، لیکن حالیہ برسوں میں تعلقات میں نمایاں بہتری آئی ہے جو ایک مثبت پیش رفت ہے۔ رپورٹس کے مطابق، پاکستان اور امریکا کے درمیان نایاب معدنیات کی برآمد اور تکنیکی تعاون کے حوالے سے بات چیت جاری ہے، جس سے دونوں ممالک کے درمیان اقتصادی اور اسٹریٹجک روابط مزید مضبوط ہونے کی توقع ہے۔