اسلام آباد میں ماحولیات کے تحفظ سے متعلق ایک بڑی پیش رفت سامنے آئی ہے، جہاں گرین کلائمیٹ فنڈ نے پاکستان کے لیے 25 کروڑ ڈالر کی مالی امداد کی منظوری دے دی ہے۔ ایشیائی ترقیاتی بینک (ADB) کے جاری کردہ اعلامیے کے مطابق، یہ رقم “گلیشیئرز ٹو فارمز” منصوبے کے لیے مختص کی گئی ہے، جس کا مقصد گلیشیئرز سے نکلنے والے آبی نظاموں کو ماحولیاتی تبدیلی کے اثرات سے محفوظ بنانا اور مقامی سطح پر پائیدار زرعی ترقی کو فروغ دینا ہے۔ اعلامیے کے مطابق، اس منصوبے کے تحت سوات سمیت دیگر شمالی علاقوں میں کسانوں کو جدید زرعی اور آبپاشی کی سہولیات فراہم کی جائیں گی تاکہ پانی کے مؤثر استعمال اور زراعت کی پیداوار میں اضافہ ممکن ہو سکے۔ منصوبہ ایشیائی ترقیاتی بینک کی معاونت سے مکمل کیا جائے گا، جو پاکستان کے موسمیاتی تحفظ اور زرعی استحکام کے لیے ایک اہم سنگ میل ثابت ہوگا۔