کراچی میں حال ہی میں نافذ کیے گئے جدید فیس لیس ای ٹکٹنگ نظام نے قانون کی بالادستی کا عملی مظاہرہ کرتے ہوئے ڈی آئی جی ٹریفک پیر محمد شاہ کی سرکاری گاڑی کا بھی چالان جاری کر دیا۔ تفصیلات کے مطابق، یہ کارروائی لیاری ایکسپریس وے سے گارڈن انٹرچینج کے قریب اس وقت عمل میں آئی جب گاڑی کا ڈرائیور سیٹ بیلٹ باندھنے میں ناکام رہا۔ نظام کے ذریعے خلاف ورزی ریکارڈ ہونے پر 10 ہزار روپے کا جرمانہ عائد کیا گیا۔ ذرائع کے مطابق، واقعے کے وقت ڈی آئی جی ٹریفک خود گاڑی میں موجود نہیں تھے، جبکہ ان کا اسکواڈ انہیں گارڈن ہیڈکوارٹر سے لینے کے لیے جا رہا تھا۔ ترجمان ٹریفک پولیس نے مؤقف اختیار کیا کہ قانون سے بالاتر کوئی نہیں، اور ای ٹکٹنگ سسٹم کے ذریعے ٹریفک قوانین کی خلاف ورزی کرنے والے کے خلاف بلا امتیاز کارروائی کی جائے گی۔ ترجمان نے شہریوں سے اپیل کی کہ وہ اپنی اور دوسروں کی حفاظت کے لیے ٹریفک قوانین کی مکمل پاسداری کریں اور سیٹ بیلٹ کا استعمال ہر صورت یقینی بنائیں۔