پاکستان نے 2025 سے 2030 کے دوران ملک بھر میں 3,000 الیکٹرک وہیکل (EV) چارجنگ اسٹیشنز نصب کرنے کا ہدف مقرر کیا ہے، تاکہ صاف اور جدید ٹرانسپورٹیشن کی طرف منتقلی کو تیز کیا جا سکے۔
سرکاری خبر رساں ادارے اے پی پی کے ساتھ شیئر کیے گئے ایک سرکاری دستاویز کے مطابق، موجودہ مالی سال کے لیے 240 چارجنگ اسٹیشنز مختص کیے گئے ہیں۔
چارجنگ اسٹیشنز نجی کمپنیوں کے ذریعے قائم کیے جائیں گے، جبکہ اس منصوبے کی نگرانی وزارتِ صنعت و پیداواری، نیکا (NEECA)، وزارتِ توانائی، نیپرا (NEPRA) اور بجلی کی تقسیم کار کمپنیوں کی مشترکہ ذمہ داری ہوگی۔
یہ اقدام ڈرافٹ نیو انرجی وہیکل پالیسی کا اہم حصہ ہے، جو وزارتِ صنعت و پیداوار نے ملک بھر میں الیکٹرک موبیلٹی کے فروغ کے لیے تیار کی ہے۔
24 اکتوبر 2024 کو الیکٹرک وہیکل چارجنگ انفراسٹرکچر اور بیٹری سوئپنگ اسٹیشنز ریگولیشنز کے اجرا کے بعد سے اب تک نیکا 72 لائسنس جاری کر چکی ہے، جن کے تحت EV چارجنگ اسٹیشنز قائم کیے جا رہے ہیں۔
