وفاقی تحقیقاتی ایجنسی (ایف آئی اے) نے پاکستانی شہریوں کو خبردار کیا ہے کہ جنوب مشرقی ایشیا میں سرگرم جرائم پیشہ گروہ آئی ٹی اور کال سینٹرز میں پرکشش ملازمتوں کا جھانسہ دے کر انہیں دھوکے کا نشانہ بنا رہے ہیں۔
ایف آئی اے کے مطابق یہ نیٹ ورکس تھائی لینڈ، میانمر، لاؤس، ویتنام اور کمبوڈیا میں کام کرتے ہیں اور پاکستانیوں کو اچھی تنخواہ اور فوری روزگار کا وعدہ کرکے بیرونِ ملک بلاتے ہیں۔

ایف آئی اے کے ڈپٹی ڈائریکٹر محمود علی کھوکھر نے بتایا کہ ان ممالک میں جانے والے متعدد پاکستانیوں کو وہاں پہنچنے کے بعد سائبر اور مالیاتی جرائم پر مجبور کیا جاتا ہے۔ انہوں نے کہا کہ گروہ متاثرین کے پاسپورٹ ضبط کر لیتے ہیں، دھمکیاں دیتے ہیں اور تعاون نہ کرنے پر ان کے اہل خانہ سے رقم بٹورتے ہیں۔

کھوکھر نے تمام روزگار کے خواہشمند افراد پر زور دیا کہ وہ کسی بھی اوورسیز ملازمت کی پیشکش کو قبول کرنے سے پہلے اس کی سرکاری ذرائع سے تصدیق ضرور کریں۔ انہوں نے کہا کہ کوئی بھی بظاہر پرکشش آفر ’’ڈراؤنے خواب‘‘ میں تبدیل ہوسکتی ہے۔

سیکڑوں پاکستانی متاثر — متعدد کیسز سامنے آگئے

ایف آئی اے نے اس انتباہ کے بعد آگاہی مہم بھی شروع کردی ہے، کیونکہ حالیہ مہینوں میں کئی واقعات سامنے آئے ہیں جن میں پاکستانی شہری جعل ساز گروہوں کے قبضے سے بازیاب یا فرار ہوئے:

تھائی اور کمبوڈین حکام نے ایک بڑے فراڈ سینٹر پر چھاپے کے دوران 215 غیر ملکیوں کو بازیاب کیا، جن میں 50 پاکستانی شامل تھے۔

38 پاکستانی میانمر میں ملٹری کریک ڈاؤن کے دوران فرار ہو کر تھائی لینڈ پہنچے۔

تقریباً 60 پاکستانی اب بھی مختلف شیلٹرز میں موجود ہیں اور ان کی جانچ پڑتال جاری ہے۔

ایف آئی اے کے مطابق متاثرین کو عموماً اسمگل یا ٹریفک کرکے ان مراکز تک لایا جاتا ہے، جہاں انہیں جعلی کرپٹو اسکیموں، سرمایہ کاری فراڈ، اور آن لائن مالی بلیک میلنگ جیسے بڑے پیمانے کے سائبر جرائم میں مجبور کیا جاتا ہے۔

ایف آئی اے کی آگاہی مہم

حکام نے عوام کو مشورہ دیا ہے کہ بیرونِ ملک ملازمت کے لیے صرف حکومتی منظور شدہ ریکروٹمنٹ ایجنسیوں پر اعتماد کریں اور کسی بھی مشکوک سرگرمی کی فوری اطلاع ایف آئی اے کو دیں۔