لاہور: وزیرِ اعلیٰ پنجاب مریم نواز شریف نے پنجاب ٹریفک وارڈنز کے لیے نیا پروموشن اسٹرکچر منظور کر لیا ہے، جس کے تحت اب ٹریفک وارڈنز کو گریڈ 16 کے سینئر ٹریفک وارڈن (STW) اور گریڈ 17 کے ٹریفک آفیسر (TO) کے عہدوں تک ترقی کے مواقع میسر ہوں گے۔

اس فیصلے کا مقصد ٹریفک وارڈنز کے لیے واضح کیریئر ترقی کا راستہ فراہم کرنا اور ان کی خدمات کا اعتراف کرتے ہوئے ان کی حوصلہ افزائی کرنا ہے۔

پنجاب پولیس کے ترجمان کے مطابق نئے فریم ورک کے تحت ترقیاں سینیارٹی اور میرٹ دونوں بنیادوں پر دی جائیں گی۔ انسپکٹر جنرل آف پولیس پنجاب ڈاکٹر عثمان انور نے بتایا کہ
50 فیصد ترقیاں سینیارٹی کی بنیاد پر جبکہ 50 فیصد ترقیاں پنجاب پبلک سروس کمیشن (PPSC) کے ذریعے لیے جانے والے امتحانات کی بنیاد پر دی جائیں گی۔

آئی جی پنجاب کے مطابق سینئر ٹریفک وارڈنز اور ٹریفک آفیسرز کے لیے امتحانات جلد منعقد کیے جائیں گے۔ حکام کا کہنا ہے کہ اس اقدام سے محکمہ ٹریفک پولیس میں پیشہ ورانہ صلاحیت، نظم و ضبط اور کارکردگی میں مزید بہتری آئے گی۔