لاہور: پاکستان سپر لیگ (پی ایس ایل) کی فرنچائز ملتان سلطانز کے سابق مالک علی خان ترین نے پاکستان میں نئی ڈومیسٹک فٹبال لیگ کے آغاز کی دوڑ میں باضابطہ طور پر شمولیت اختیار کر لی ہے۔
علی ترین ان تین امیدواروں میں شامل ہیں جنہوں نے پاکستان فٹبال فیڈریشن (پی ایف ایف) سے نئی قومی فٹبال لیگ کے قیام کے لیے منظوری طلب کی ہے۔ یہ اقدام ملک میں طویل عرصے سے غیر فعال فٹبال نظام کو بحال کرنے کی کوششوں کا اہم حصہ قرار دیا جا رہا ہے۔
پی ایف ایف نے فٹبال اصلاحات کے تحت افراد اور کمپنیوں کو قومی لیگ کے لیے تجاویز جمع کرانے کی دعوت دی تھی۔ علی ترین نے تصدیق کی ہے کہ انہوں نے درخواست جمع کرانے کے آخری دن اپنی تجویز باقاعدہ طور پر پی ایف ایف کو جمع کرا دی ہے۔
ذرائع کے مطابق دیگر تجاویز کے برعکس، جو فرنچائز سسٹم پر مبنی ہیں، علی ترین کا منصوبہ چھ ماہ پر مشتمل لیگ اسٹرکچر پر مبنی ہے، جس کا مقصد فٹبال کی طویل المدتی ترقی اور پائیداری کو یقینی بنانا ہے۔
ان کی تجویز میں ہوم اینڈ اوے میچز، ٹیموں کی ایکویٹی ملکیت، اور شہر کی بنیاد پر مقابلے شامل ہیں، جہاں ہر شہر کی دو ٹیمیں ہوں گی۔ مزید برآں، علی ترین نے خواتین فٹبال ٹیموں کی لازمی شمولیت کی بھی حمایت کی ہے، جو میچ ڈے پر مردوں کے مقابلوں سے قبل کھیلیں گی، جیسا کہ کئی عالمی لیگز میں رائج ہے۔
تینوں امیدوار 29 دسمبر کو اپنی تفصیلی تجاویز پاکستان فٹبال فیڈریشن کے سامنے پیش کریں گے، جس کے بعد پی ایف ایف نئی لیگ کے قیام کے لیے اپنے منتخب شراکت دار کا اعلان کرے گی۔
فٹبال حلقوں کا کہنا ہے کہ اگر یہ منصوبہ عملی شکل اختیار کرتا ہے تو یہ پاکستان میں فٹبال کے فروغ اور بین الاقوامی معیار کے قریب لانے میں اہم کردار ادا کر سکتا ہے۔
