امریکی صدر ڈونلڈ ٹرمپ نے ایک بار پھر پاکستان کے فیلڈ مارشل سید عاصم منیر کی تعریف کرتے ہوئے انہیں ایک انتہائی معزز جنرل اور بہادر جنگجو قرار دیا ہے۔ فلوریڈا میں منعقدہ ایک تقریب سے خطاب کے دوران ٹرمپ نے پاک فوج کے سربراہ کی پیشہ ورانہ صلاحیتوں اور قیادت کو سراہا۔
صدر ٹرمپ نے اس موقع پر ایک مرتبہ پھر یہ دعویٰ بھی دہرایا کہ انہوں نے پاکستان اور بھارت کے درمیان ممکنہ جوہری جنگ کو رکوانے میں کردار ادا کیا۔ ان کا کہنا تھا کہ پاکستانی وزیراعظم نے خود انہیں بتایا کہ اس مداخلت کے نتیجے میں ایک کروڑ انسانی جانیں بچائی گئیں۔
امریکی صدر نے پاک امریکا تعلقات میں بہتری کا بھی ذکر کیا اور کہا کہ مئی میں دونوں ممالک کے درمیان کشیدگی کے بعد امریکا کی ثالثی سے ہونے والی جنگ بندی نے خطے میں امن قائم رکھنے میں اہم کردار ادا کیا۔
ٹرمپ کے مطابق پاکستان اور امریکا کے تعلقات ایک مثبت سمت میں آگے بڑھ رہے ہیں، جبکہ خطے میں استحکام کے لیے مشترکہ سفارتی کوششیں مستقبل میں بھی جاری رہیں گی۔
