پاکستان میڈیکل اینڈ ڈینٹل کونسل (پی ایم ڈی سی) نے ملک بھر کے نجی میڈیکل اور ڈینٹل کالجز میں ایم بی بی ایس اور بی ڈی ایس پروگرامز کی ٹیوشن فیس کی حد مقرر کرنے کا اعلان کر دیا ہے۔ یہ فیصلہ وزیرِاعظم پاکستان کی ہدایت پر بنائی گئی کمیٹی کی سفارشات کے بعد کیا گیا۔

نوٹیفکیشن کے مطابق، 2024-25 کے سیشن کے دوران تمام سال کے طلبہ کے لیے ٹیوشن فیس، بشمول دیگر تمام اضافی چارجز، 18 لاکھ روپے مقرر کی گئی ہے۔ 2025-26 کے سیشن میں فیس میں 5 فیصد اضافہ کرتے ہوئے یہ 18.9 لاکھ روپے ہوگی اور یہ تمام سال کے طلبہ پر لاگو ہوگی۔

2026 سے آگے ٹیوشن فیس میں کسی بھی اضافے کا انحصار صرف صارف قیمت اشاریہ (CPI) پر ہوگا اور اس کے لیے الگ سے سرکاری نوٹیفکیشن جاری کیا جائے گا۔

پی ایم ڈی سی نے تمام نجی میڈیکل اور ڈینٹل کالجز کو ہدایت کی ہے کہ وہ ان اصولوں کی مکمل پابندی کریں۔ جو ادارے قواعد کی خلاف ورزی کریں گے، ان کے خلاف پی ایم اینڈ ڈی سی ایکٹ، 2022 کے تحت کارروائی کی جائے گی۔