راولپنڈی اور اسلام آباد کے سنگم پر واقع مصروف مقام فیض آباد انٹرچینج میں سیکیورٹی خدشات کے باعث متعدد بس ٹرمینلز بند کر دیے گئے ہیں۔ حکام کے مطابق یہ اقدام جڑواں شہروں میں جاری سیکیورٹی جائزے کا حصہ ہے۔
اسلام آباد پولیس نے وضاحت کی ہے کہ فیض آباد انٹرچینج کے تمام بس اڈے سیل نہیں کیے گئے، بلکہ صرف اُن اڈوں کے خلاف کارروائی کی گئی ہے جو معیاری آپریٹنگ طریقہ کار (ایس او پیز) کی خلاف ورزی کر رہے تھے۔
حکام کے مطابق ان بس اڈوں کے خلاف ایکشن لیا گیا جو مسافروں کا اندراج اسلام آباد پولیس کی جانب سے فراہم کردہ سافٹ ویئر پر نہیں کر رہے تھے اور جہاں لازمی واک تھرو گیٹس نصب نہیں کیے گئے تھے۔
اسلام آباد پولیس کا کہنا ہے کہ سیکیورٹی ضوابط کو نظر انداز کرنے والے بس ٹرمینلز کے خلاف سخت قانونی کارروائی جاری ہے۔ اس کارروائی کا مقصد مسافروں کے تحفظ کو یقینی بنانا اور اس مصروف ٹرانسپورٹ حب میں نگرانی کے نظام کو مزید مؤثر بنانا ہے۔
