21 سالہ نوجوان کھلاڑی نے انگلش حریف کو اسٹریٹ گیمز میں شکست دے کر پہلی پی ایس اے ٹرافی جیت لی
کراچی: پاکستان کے ابھرتے ہوئے اسکواش اسٹار اشعب عرفان نے کینیڈا میں منعقدہ وینکوور اوپن 2025 جیت کر اپنے کیریئر کا پہلا پی ایس اے ورلڈ ٹور ٹائٹل اپنے نام کرلیا۔
فائنل میں اشعب عرفان نے شاندار کھیل کا مظاہرہ کرتے ہوئے انگلینڈ کے سیم ٹوڈ کو 0-3 سے شکست دی۔ یہ میچ 43 منٹ تک جاری رہا جس میں اشعب نے 11-9، 11-1، 11-5 سے کامیابی حاصل کی۔
یہ مقابلہ رچرڈسن ویلتھ مینز اوپن 2025 کے تحت پی ایس اے ورلڈ ٹور کے کاپر ایونٹ کی سطح پر کھیلا گیا، جس میں 31 ہزار 250 امریکی ڈالر کی انعامی رقم رکھی گئی تھی۔
21 سالہ اشعب عرفان کی یہ جیت پاکستان کے اسکواش کے لیے ایک نیا سنگِ میل قرار دی جا رہی ہے۔ وہ نور زمان کے ساتھ اُن نوجوان کھلاڑیوں میں شامل ہیں جو عالمی سطح پر تیزی سے اپنی شناخت بنا رہے ہیں۔
ایونٹ میں پاکستان کے دو کھلاڑی شریک تھے، تاہم تیسرے سیڈ نور زمان کو کوارٹر فائنل میں انگلش کھلاڑی سیم ٹوڈ کے ہاتھوں 2-3 سے شکست کا سامنا کرنا پڑا۔
