پاکستان کرکٹ ٹیم کے سابق کپتان بابر اعظم نے طویل انتظار کے بعد بالآخر اپنی شاندار فارم بحال کرتے ہوئے آٹھ سو سات دن بعد سنچری اسکور کی اور پاکستان کی جانب سے ون ڈے میچز میں سب سے زیادہ سنچریوں کا سعید انور کا ریکارڈ برابر کر دیا۔

راولپنڈی میں سری لنکا کے خلاف دوسرے ون ڈے میں بابر اعظم نے نہایت ذمہ دارانہ بیٹنگ کرتے ہوئے 119 گیندوں پر 102 رنز بنائے۔ اس اننگز کے ساتھ بابر اعظم نے صرف 136 اننگز میں 20 سنچریاں مکمل کر لیں اور کم سے کم اننگز میں 20 ون ڈے سنچریاں بنانے والے دنیا کے تیسرے تیز ترین کھلاڑی بن گئے۔

بابر اعظم نے اس سے قبل آخری بین الاقوامی سنچری 30 اگست 2023 کو بنائی تھی، جس کے بعد شائقین ان کی بڑی اننگز کے منتظر تھے۔

ان کی سنچری کی بدولت پاکستان نے سری لنکا کو 8 وکٹوں سے شکست دے کر سیریز 0-2 سے اپنے نام کر لی۔ بابر کی فارم میں واپسی پاکستان کرکٹ کے لیے ایک مثبت اور حوصلہ افزا پیش رفت قرار دی جا رہی ہے۔