سرکاری حج اسکیم کے تحت حج واجبات کی دوسری اور آخری قسط کی وصولی آج سے شروع ہو گئی ہے، جو 10 نومبر تک جاری رہے گی، جبکہ حکام نے واضح کر دیا ہے کہ مقررہ مدت میں ادائیگی نہ کرنے والے عازمین حج پر نہیں جا سکیں گے۔ ذرائع کے مطابق دوسری قسط کی مد میں فی کس ساڑھے 6 لاکھ روپے وصول کیے جائیں گے اور اس قسط کی ادائیگی تک حج درخواست گزاروں کو اپنے منتخب پیکج میں تبدیلی کا اختیار بھی حاصل ہوگا، تاہم قسط جمع ہونے کے بعد پیکج تبدیل نہیں کیا جا سکے گا۔ ذرائع نے مزید بتایا کہ دوسری قسط بروقت جمع نہ کرانے کی صورت میں درخواست خود بخود منسوخ تصور ہوگی اور منسوخ شدہ درخواستوں کی پہلی قسط کی رقم متعلقہ درخواست گزار کے بینک اکاؤنٹ میں واپس کر دی جائے گی۔
