پنجاب کی پہلی ای ٹیکسی اسکیم سے متعلق اسٹیئرنگ کمیٹی کا اجلاس صوبائی وزیر ٹرانسپورٹ و ماس ٹرانزٹ بلال اکبر خان کی زیرِ صدارت منعقد ہوا۔
سرکاری تفصیلات کے مطابق یہ اجلاس اسٹیئرنگ کمیٹی کا تیسرا سیشن تھا، جس میں منصوبے کی پیش رفت کا جائزہ لیا گیا۔ اجلاس میں بتایا گیا کہ اسکیم کے پہلے مرحلے کے لیے 1,100 الیکٹرک گاڑیاں مختص کی گئی ہیں۔
حکام نے آگاہ کیا کہ ای ٹیکسی اسکیم کے لیے اب تک 22 ہزار سے زائد درخواستیں موصول ہو چکی ہیں، جن کی جانچ پڑتال کا عمل جاری ہے جبکہ منظوری کا مرحلہ بھی پیش رفت میں ہے۔
اجلاس میں بتایا گیا کہ یہ اسکیم روزگار کے نئے مواقع فراہم کرے گی، خاص طور پر خواتین کے لیے۔ حکام کا کہنا تھا کہ عوامی دلچسپی میں اضافے کے پیش نظر ای ٹیکسی اسکیم کا دائرہ کار پنجاب کے مزید شہروں تک بڑھانے کا فیصلہ کیا گیا ہے۔
یہ منصوبہ نہ صرف ماحول دوست ٹرانسپورٹ کے فروغ میں مدد دے گا بلکہ شہری سفری سہولیات اور روزگار کے مواقع میں بھی اضافہ کرے گا۔
