وزارتِ خزانہ نے اعلان کیا ہے کہ ملک کے اعلیٰ سرکاری افسران کے اثاثوں کی تفصیلات 2026 کے اختتام تک عوامی رسائی کے لیے آن لائن فراہم کر دی جائیں گی۔ یہ اقدام شفافیت اور احتساب کے نظام کو مزید مضبوط بنانے کی جانب ایک اہم پیش رفت قرار دیا جا رہا ہے۔
نئے نظام کے تحت گریڈ 17 سے 22 تک کے تمام وفاقی اور صوبائی افسران کو اپنے ملکی اور غیر ملکی اثاثے ظاہر کرنا لازمی ہوگا۔ ان اثاثوں کی رسک بیسڈ ویریفیکیشن کی جائے گی، جبکہ بینک بھی انہیں اینٹی منی لانڈرنگ (AML) اقدامات کے تحت جانچیں گے۔
وزارتِ خزانہ کے مطابق اس نظام کا مقصد سرکاری افسران کے مالی معاملات میں شفافیت پیدا کرنا اور کسی بھی ممکنہ بے ضابطگی کی بروقت نشاندہی کرنا ہے۔ اثاثوں کا ریکارڈ ڈیجیٹل پلیٹ فارم پر محفوظ کیا جائے گا تاکہ نگرانی اور تصدیق کا عمل مؤثر بنایا جا سکے۔
یہ فیصلہ عالمی مالیاتی فنڈ (IMF) کی گورننس اور کرپشن سے متعلق تشخیصی رپورٹ کے بعد سامنے آیا ہے، جس میں پاکستان کو سینئر سول سرونٹس کے احتسابی نظام کو مضبوط بنانے کی سفارش کی گئی تھی۔
ماہرین کے مطابق اثاثوں کی تفصیلات کو عوامی سطح پر دستیاب کرنا نہ صرف اعتماد سازی میں مدد دے گا بلکہ سرکاری نظام میں شفاف طرزِ حکمرانی کو بھی فروغ دے گا۔
