اسلام آباد: نئے سال کے ساتھ ہی بجلی صارفین کے لیے مزید مہنگائی کا خدشہ پیدا ہو گیا ہے، کیونکہ نیشنل الیکٹرک پاور ریگولیٹری اتھارٹی (نیپرا) نے بجلی کے اوسط بنیادی ٹیرف میں اضافے کا فیصلہ وفاقی حکومت کو ارسال کر دیا ہے۔ اس فیصلے پر حتمی عملدرآمد حکومتی منظوری کے بعد متوقع ہے۔
نیپرا کی جانب سے جاری اعلامیے کے مطابق جنوری 2026 سے بجلی کا اوسط بنیادی ٹیرف 33 روپے 38 پیسے فی یونٹ مقرر کرنے کی تجویز دی گئی ہے، جبکہ اس وقت نافذ بنیادی نرخ 31 روپے 59 پیسے فی یونٹ ہیں۔ اس طرح صارفین کو فی یونٹ تقریباً 1 روپے 79 پیسے اضافی ادا کرنا پڑ سکتے ہیں، جس کا براہِ راست اثر ماہانہ بلوں پر پڑے گا۔
اعلامیے میں یہ بھی واضح کیا گیا ہے کہ نیا مقرر کردہ بنیادی ٹیرف مالی سال 2025-26 کے لیے پہلے سے طے شدہ 34 روپے فی یونٹ کے مقابلے میں 62 پیسے کم ہے، تاہم اس کے باوجود مجموعی بوجھ میں اضافہ متوقع ہے۔
نیپرا کے مطابق سال 2026 کے لیے بجلی کی تقسیم کار کمپنیوں کی مجموعی مالی ضروریات کا تخمینہ 3 ہزار 389 ارب روپے لگایا گیا ہے، جس میں بجلی کی خریداری کی مد میں 2 ہزار 923 ارب روپے شامل ہیں، جبکہ 456 ارب روپے سے زائد رقم تقسیم کار کمپنیوں کے اخراجات اور منافع کے لیے رکھی گئی ہے۔
ادارے کا کہنا ہے کہ آئندہ سال بجلی کی مجموعی فروخت کا تخمینہ 101 ارب یونٹس لگایا گیا ہے، جبکہ ہر تقسیم کار کمپنی کے لیے علیحدہ ٹیرف مقرر کیا گیا ہے۔ اس کے باوجود ملک بھر میں یکساں بجلی ٹیرف پالیسی نافذ رہے گی، جس سے تمام صارفین پر یکساں اثر پڑے گا۔
ماہرین کے مطابق بجلی کے بنیادی ٹیرف میں اضافے سے گھریلو صارفین کے ساتھ ساتھ تجارتی اور صنعتی شعبہ بھی متاثر ہوگا، جس کے نتیجے میں مہنگائی کی مجموعی شرح میں اضافے کا خدشہ مزید بڑھ سکتا ہے۔
