پاکستان میں آئس کریم انڈسٹری کے لیے ایک اہم پیش رفت سامنے آئی ہے، جہاں میگنم آئس کریم کمپنی پاکستان لمیٹڈ کو باضابطہ طور پر رجسٹر کر لیا گیا ہے۔ یہ کمپنی یونیلور گروپ سے علیحدگی کے بعد ایک آزاد ادارے کے طور پر کام کرے گی، جو ملکی سطح پر ایک تاریخی اسپن آف قرار دیا جا رہا ہے۔
کمپنی کے کنٹری جنرل منیجر کیہان زینجین اوغلو نے اس موقع کو ایک “اہم سنگِ میل” قرار دیتے ہوئے کہا کہ نئی کمپنی پاکستان میں مینوفیکچرنگ صلاحیت، کولڈ چین انفراسٹرکچر اور ڈیجیٹل ٹیکنالوجی میں نمایاں سرمایہ کاری کرے گی۔
میگنم آئس کریم کمپنی کے تحت مشہور برانڈز میگنم، کارنیٹو اور والز شامل ہیں، جو پہلے ہی پاکستانی صارفین میں خاصی مقبولیت رکھتے ہیں۔ انتظامیہ کے مطابق اس توسیعی منصوبے سے نئے روزگار کے مواقع پیدا ہوں گے اور ملکی معیشت کو فروغ ملے گا۔
کمپنی کا کہنا ہے کہ آزادی کے بعد وہ زیادہ مؤثر حکمتِ عملی کے ساتھ مارکیٹ میں جدت، معیار اور صارفین کے تجربے کو مزید بہتر بنانے پر توجہ دے گی، جس سے پاکستان کی فوڈ اور فریزڈ مصنوعات کی صنعت کو ایک نیا رخ ملنے کی توقع ہے۔
