کراچی: انگلینڈ کے کپتان ہیری بروک نے نیوزی لینڈ کے خلاف دوسرے ٹی 20 میچ میں شاندار بیٹنگ کرتے ہوئے اپنی ٹی ٹوئنٹی انٹرنیشنل رنز کی تعداد 1000 تک پہنچا دی۔

ہیگلے اوول میں کھیلے گئے میچ میں ہیری بروک نے 35 گیندوں پر 78 رنز بنائے، جس میں 6 چوکے اور 5 چھکے شامل تھے۔ یہ سنگ میل انہوں نے اپنے 51ویں ٹی 20 میچ میں حاصل کیا اور اس کے ساتھ ہی انگلینڈ کے 10ویں کھلاڑی بن گئے جنہوں نے ٹی 20 انٹرنیشنل میں 1000 رنز کا ہدف عبور کیا۔

انگلینڈ کے سابق کپتان اور وکٹ کیپر جوز بٹلر 143 میچز میں 3869 رنز کے ساتھ سب سے زیادہ رنز بنانے والے کھلاڑی ہیں، جبکہ ایون مورگن 115 میچز میں 2458 اور ایلکس ہیلز 75 میچز میں 2074 رنز کے ساتھ دیگر نمایاں کھلاڑی ہیں۔

میچ میں انگلینڈ نے پہلے بیٹنگ کرتے ہوئے 20 اوورز میں 4 وکٹوں کے نقصان پر 236 رنز بنائے، جہاں فل سالٹ نے 85 اور ہیری بروک نے 78 رنز بنائے۔ نیوزی لینڈ کی ٹیم ہدف کے تعاقب میں 18 اوورز میں 171 رنز پر آؤٹ ہوگئی، جس کے نتیجے میں انگلینڈ نے 65 رنز سے کامیابی حاصل کی۔ نیوزی لینڈ نے ٹاس جیت کر پہلے فیلڈنگ کا فیصلہ کیا تھا۔