پاکستان کے لیے کھیلوں کی دنیا میں ایک تاریخی سنگِ میل طے ہو گیا ہے، جب سیدہ آمنہ بتول، رکن قومی اسمبلی، کو فیفا کی معتبر Institutional Reforms Committee میں شامل کیا گیا۔
باضابطہ اعلامیے کے مطابق، سیدہ آمنہ اس وقت واحد پاکستانی ہیں جو فیفا کی کسی بھی کمیٹی میں خدمات انجام دے رہی ہیں۔ ان کی یہ تعیناتی فیفا کے پاکستان میں ادارہ جاتی اصلاحات اور عالمی فٹبال گورننس میں پاکستان کے مثبت کردار پر اعتماد کا مظہر ہے۔
یہ کامیابی حکومت کی جانب سے فٹبال کو فروغ دینے اور ملک میں کھیلوں کے اداروں کو مضبوط بنانے کی مستقل کوششوں کا نتیجہ سمجھی جا رہی ہے۔ وزیراعظم شہباز شریف نے حال ہی میں ایشین فٹبال کنفیڈریشن (AFC) کے صدر اور نائب صدر سے ملاقات میں بھی پاکستان کی فٹبال فیڈریشن کو مضبوط بنانے اور بین الاقوامی فٹبال ایونٹس کی میزبانی کے عزم پر زور دیا۔
فیفا کے صدر نے بھی وزیراعظم شہباز شریف کے پاکستان میں فٹبال کو فروغ دینے کے عزم کو سراہا۔ مستقبل میں پاکستان اور فیفا کے درمیان تعاون منظم، عملی اور شراکت داری پر مبنی انداز میں جاری رہے گا۔
سیدہ آمنہ بتول کی ذمہ داریوں میں عالمی فٹبال میں ادارہ جاتی اصلاحات کو مضبوط کرنا اور گورننس کے نظام کو بہتر بنانے پر توجہ مرکوز ہوگی، جس سے پاکستان کی فٹبال نمائندگی اور اثر و رسوخ میں اضافہ متوقع ہے۔
