پنجاب بھر کی ماتحت عدالتوں میں یکم نومبر کو تعطیل کا اعلان کر دیا گیا ہے، جو پنجاب بار کونسل کے انتخابات کے باعث ہوگی۔ جاری نوٹیفکیشن کے مطابق صوبے بھر میں وکلاء کے انتخابات کے دن تمام ماتحت عدالتیں بند رہیں گی تاکہ انتخابی عمل میں آسانی رہے۔ یکم نومبر کو ہونے والے ان انتخابات سے قبل وکلاء برادری میں جوڑ توڑ اور سیاسی سرگرمیاں عروج پر پہنچ چکی ہیں، جبکہ صوبے کے مختلف ڈویژنوں—لاہور، راولپنڈی، فیصل آباد، ملتان، گوجرانوالہ، بہاولپور، ڈیرہ غازی خان، سرگودھا اور ساہیوال—میں پولنگ اسٹیشنز قائم کیے گئے ہیں۔ انتخابات میں مجموعی طور پر 341 امیدوار حصہ لے رہے ہیں، جن میں سے صرف لاہور ڈویژن میں 93 امیدواروں کے درمیان سخت مقابلہ متوقع ہے۔ دوسری جانب ضلع نارووال میں حضرت پیر سید جماعت علی شاہ لاثانیؒ کے سالانہ عرس کے موقع پر بھی یکم نومبر کو عام تعطیل کا اعلان کیا گیا ہے، جس کے باعث اتوار کے ساتھ دو روزہ تعطیلات ہوں گی۔ ڈپٹی کمشنر سید حسن رضا نے اس حوالے سے باقاعدہ نوٹیفکیشن جاری کر دیا ہے۔