انٹرنیشنل کرکٹ کونسل (آئی سی سی) نے وائیڈ بال کے قانون میں تبدیلی کے لیے نیا ٹرائل سسٹم متعارف کروا دیا ہے۔ آسٹریلیا اور بھارت کے درمیان پرتھ میں کھیلے جانے والے پہلے ون ڈے میچ کے دوران وکٹ کے دونوں جانب نیلے رنگ کی نئی لکیروں نے شائقین کی توجہ حاصل کی۔ اسی طرح کا منظر میرپور میں بنگلادیش اور ویسٹ انڈیز کے درمیان میچ میں بھی دیکھا گیا، جہاں ان لکیروں نے سب کو حیران کر دیا۔ ذرائع کے مطابق آئی سی سی نے لیگ اسٹمپ کے قریب وائیڈ بال کے تعین کے لیے نئی لائنز کا تجربہ شروع کر دیا ہے، جو آئندہ چھ ماہ کے لیے آزمائشی بنیادوں پر جاری رہے گا۔ تجربہ کامیاب ہونے کی صورت میں یہ قانون باضابطہ طور پر وائٹ بال کرکٹ میں شامل کر لیا جائے گا۔ ⚖️ پرانا قانون موجودہ قانون کے تحت اگر گیند لیگ اسٹمپ کے باہر جاتی ہے تو اسے فوراً وائیڈ قرار دیا جاتا ہے، جس سے بیٹرز کو واضح فائدہ اور بولرز کو کم موقع ملتا ہے۔ 🆕 نیا قانون نئے اصول کے مطابق لیگ اسٹمپ کے قریب اضافی لکیریں کھینچی گئی ہیں۔ اب صرف وہی گیند وائیڈ سمجھی جائے گی جو ان لکیروں کے باہر سے گزرے، جبکہ لکیر کے اندر آنے والی گیند کھیل میں شامل تصور ہوگی۔ آئی سی سی کے مطابق اس نئے قانون کا مقصد امپائرنگ میں یکسانیت اور بولرز کے لیے زیادہ منصفانہ توازن پیدا کرنا ہے۔