پاکستان سپر لیگ (پی ایس ایل) نے پی ایس ایل 11 کے لیے اقبال اسٹیڈیم فیصل آباد کو باضابطہ طور پر نیا وینیو قرار دے دیا ہے، جس کے بعد فیصل آباد ٹورنامنٹ کی میزبانی کرنے والا پانچواں شہر بن گیا ہے۔
یہ فیصلہ لاہور میں واقع نیشنل کرکٹ اکیڈمی میں منعقدہ پی ایس ایل گورننگ کونسل کے اجلاس میں کیا گیا، جس کی صدارت چیئرمین پاکستان کرکٹ بورڈ محسن نقوی نے کی۔ اجلاس میں تمام آٹھ فرنچائزز کے نمائندوں کے علاوہ پی سی بی اور پی ایس ایل کے سینئر حکام نے شرکت کی۔
اجلاس کے دوران یہ بھی تصدیق کی گئی کہ پی ایس ایل 11 کا آغاز 26 مارچ سے ہوگا۔ اس کے ساتھ ساتھ کھلاڑیوں کو برقرار رکھنے (ریٹینشن) اور ہائبرڈ ڈرافٹ/آکشن ماڈل پر بھی تفصیلی مشاورت جاری ہے۔
فیصل آباد کی شمولیت کا تعلق سیا لکوٹ کی نئی پی ایس ایل فرنچائز سے جڑی منصوبہ بندی سے بھی جوڑا جا رہا ہے۔ ابتدائی اطلاعات کے مطابق سیا لکوٹ کی فرنچائز نے “ہوم اوے فرام ہوم” ماڈل پر غور کیا تھا، جس کے تحت اقبال اسٹیڈیم فیصل آباد کو ہوم گراؤنڈ کے طور پر استعمال کیا جا سکتا ہے، تاہم اس حوالے سے فرنچائز کی جانب سے تاحال حتمی اعلان نہیں کیا گیا۔
یہ تجویز اس وقت مزید مضبوط ہوئی جب فرنچائز اونر حمزہ مجید نے عندیہ دیا کہ فیصل آباد ان کے لیے ذاتی طور پر بھی ایک دوسرے گھر کی حیثیت رکھتا ہے۔ اس کے علاوہ چیئرمین پی سی بی محسن نقوی اس سے قبل بھی کہہ چکے ہیں کہ اقبال اسٹیڈیم مستقبل میں پی ایس ایل میچز کی میزبانی کرے گا، یہ بیان نئی فرنچائز کے آکشن سے پہلے دیا گیا تھا۔
دوسری جانب سیا لکوٹ میں بھی طویل المدتی بنیادوں پر میچز کی میزبانی کے منصوبے موجود ہیں۔ اطلاعات کے مطابق جناح اسٹیڈیم سیا لکوٹ کو اپ گریڈ کرنے کا منصوبہ زیر غور ہے، تاہم اگر اس میں تاخیر ہوئی تو فیصل آباد ایک مکمل اور تیار وینیو کے طور پر دستیاب ہوگا۔
اقبال اسٹیڈیم، جو پہلے لیالپور اسٹیڈیم کے نام سے جانا جاتا تھا، پاکستان کے تاریخی کرکٹ گراؤنڈز میں شمار ہوتا ہے۔ یہ اسٹیڈیم نومبر 2025 میں جنوبی افریقہ کے خلاف تین ون ڈے میچز کی سیریز کی میزبانی کے بعد بین الاقوامی کرکٹ میں واپس آیا، جہاں شائقین کی بڑی تعداد اور شاندار ماحول دیکھنے میں آیا۔
