اسلام آباد — نائب وزیرِ اعظم و وزیرِ خارجہ سینیٹر اسحاق ڈار نے سعودی وزیرِ خارجہ شہزادہ فیصل بن فرحان سے ٹیلیفون پر رابطہ کیا، جس میں مشرقِ وسطیٰ کی تازہ سیاسی صورتحال اور غزہ میں جاری بحران پر تفصیلی بات چیت ہوئی۔
ذرائع کے مطابق، دونوں رہنماؤں نے فلسطین میں انسانی صورتحال پر تشویش کا اظہار کیا اور اس بات پر زور دیا کہ خطے میں پائیدار امن کے لیے عالمی برادری کو کردار ادا کرنا چاہیے۔
مکالمے کے دوران پاکستان اور سعودی عرب کے درمیان دوطرفہ تعلقات کو مزید مضبوط بنانے اور مختلف بین الاقوامی امور پر قریبی تعاون جاری رکھنے پر بھی اتفاق کیا گیا۔
دونوں وزرائے خارجہ نے اس عزم کا اظہار کیا کہ پاکستان اور سعودی عرب خطے میں امن، استحکام اور اتحاد کے فروغ کے لیے مشترکہ کوششیں جاری رکھیں گے۔
