کراچی میٹروپولیٹن کارپوریشن (کے ایم سی) نے ڈیجیٹل گورننس کی جانب ایک اہم قدم اٹھاتے ہوئے کیو آر کوڈ پر مبنی سرکاری مراسلاتی نظام متعارف کرانے کا اعلان کر دیا ہے، جس کے تحت تمام سرکاری دستاویزات کی تصدیق ممکن ہو سکے گی۔
کے ایم سی حکام کے مطابق نیا نظام 22 دسمبر 2025 سے نافذ العمل ہو جائے گا، جس کے بعد کے ایم سی کی جانب سے جاری کیے جانے والے تمام سرکاری خطوط، نوٹسز اور مراسلات پر منفرد کیو آر کوڈ ہونا لازمی ہوگا۔ کیو آر کوڈ کے بغیر جاری کیا گیا کوئی بھی دستاویز غیر مستند تصور کیا جائے گا۔
حکام کا کہنا ہے کہ اس سسٹم کے ذریعے شہری، ادارے اور دیگر محکمے فوری طور پر سرکاری دستاویزات کی اصلیت کی تصدیق کر سکیں گے۔ اس اقدام کا بنیادی مقصد جعلی خطوط کی روک تھام اور کے ایم سی کے نام پر ہونے والی بدعنوانی کا خاتمہ ہے۔
شفافیت اور اعتماد کی بحالی کی کوشش
میئر کراچی بیرسٹر مرتضیٰ وہاب نے نئے نظام سے متعلق بریفنگ اجلاس کی صدارت کرتے ہوئے کہا کہ یہ اقدام شفافیت، مؤثریت اور جدید طرزِ حکمرانی کے لیے کے ایم سی کے عزم کی عکاسی کرتا ہے۔ ان کے مطابق ڈیجیٹل سسٹم سرکاری لین دین کو محفوظ بنانے اور عوامی اعتماد کی بحالی میں مدد دے گا۔
میئر کراچی نے کہا کہ کے ایم سی کے زیر انتظام زمین، مارکیٹس، پارکس اور عوامی سہولیات جیسے اہم اثاثے موجود ہیں، جن کے تحفظ کے لیے ایک محفوظ اور قابلِ تصدیق مراسلاتی نظام ناگزیر تھا۔
انہوں نے تمام محکموں اور افسران کو ہدایت کی کہ نئے کیو آر کوڈ سسٹم پر سختی سے عملدرآمد یقینی بنایا جائے اور کسی قسم کی رعایت نہ دی جائے۔
اعلیٰ افسران کی شرکت
اجلاس میں میونسپل کمشنر ایس ایم افضل زیدی، فنانشل ایڈوائزر گلزار ابڑو اور ڈائریکٹر میڈیا دانیال سیال سمیت دیگر اعلیٰ افسران نے شرکت کی اور نظام کے نفاذ سے متعلق تفصیلی بریفنگ لی۔
کے ایم سی حکام کا ماننا ہے کہ یہ ڈیجیٹل اقدام نہ صرف سرکاری امور میں تاخیر کم کرے گا بلکہ کراچی کے شہریوں کے لیے بلدیاتی خدمات کو تیز، مؤثر اور زیادہ شفاف بنانے میں اہم کردار ادا کرے گا۔
