اسلام آباد میں میچوں کے دوران بار بار پیدا ہونے والے ٹریفک مسائل کو مدنظر رکھتے ہوئے وزارتِ داخلہ نے وفاقی دارالحکومت کے اپنے کرکٹ اسٹیڈیم کی تعمیر کے منصوبے کو فوری طور پر تیز کرنے کا فیصلہ کر لیا ہے۔ ذرائع کے مطابق حکومت سیکٹر D-12 میں جدید ترین کرکٹ اسٹیڈیم کی تعمیر کے لیے عملی اقدامات تیز کر رہی ہے اور سی ڈی اے کو ہدایت کی گئی ہے کہ اس منصوبے کو ایک سال کے اندر مکمل کیا جائے۔
نیا اسٹیڈیم دبئی کے بین الاقوامی معیار کے گراؤنڈز کی طرز پر تیار کیا جائے گا، جس سے اسلام آباد کو کرکٹ کا نیا مرکز بنانے میں مدد ملے گی اور ملک بھر کے شائقینِ کرکٹ کو بہتر سہولیات میسر آئیں گی۔ حکام کا کہنا ہے کہ اسٹیڈیم کو شہر کے مرکزی علاقوں سے دور منتقل کرنے سے ہائی پروفائل میچوں کے دوران ٹریفک جام اور سیکیورٹی ڈائیورشنز میں نمایاں کمی آئے گی۔
منصوبے میں اسٹیڈیم کے ساتھ ایک لگژری ہوٹل بھی تعمیر کیا جائے گا تاکہ بین الاقوامی کرکٹ ٹیموں کو گراؤنڈ تک باآسانی رسائی اور عالمی معیار کی رہائش ایک ہی مقام پر فراہم کی جا سکے۔ اسٹیڈیم کمپلیکس میں جدید سیکیورٹی سسٹم، اسمارٹ پارکنگ، اور بہتر ٹرانسپورٹ لنکس شامل ہوں گے، جو اسے یو اے ای کے بہترین اسپورٹس کمپلیکسز کے معیار کے قریب لے جائیں گے۔
یہ فیصلہ پاکستان میں کرکٹ انفراسٹرکچر مضبوط بنانے کی جانب ایک اہم پیش رفت ہے، جس کے بعد اسلام آباد آنے والے برسوں میں مزید بین الاقوامی ٹیموں اور بڑے کرکٹ ایونٹس کی میزبانی کے لیے بہتر طور پر تیار ہوگا۔
