راولپنڈی — ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان نے افغانستان میں موجود خوارج کے خطرے کے خلاف مؤثر اقدامات کیے ہیں اور آئندہ بھی پاک فوج ہر قسم کی جارحیت کے خلاف سیسہ پلائی دیوار بنی رہے گی۔
پاک فوج کے شعبہ تعلقاتِ عامہ (آئی ایس پی آر) کے مطابق لیفٹیننٹ جنرل احمد شریف چوہدری نے غلام اسحاق خان انسٹی ٹیوٹ آف انجینئرنگ سائنسز اینڈ ٹیکنالوجی، صوابی کا دورہ کیا، جہاں انہوں نے طلبا سے پاک افغان سرحدی صورتحال، سیکیورٹی چیلنجز اور سوشل میڈیا کے اثرات پر گفتگو کی۔
ڈی جی آئی ایس پی آر کا کہنا تھا کہ پاک فوج نے دہشت گردی کے خلاف بے مثال قربانیاں دی ہیں اور قومی سلامتی کے دفاع کے لیے ہر قیمت ادا کی ہے۔ انہوں نے کہا کہ ملک کی سلامتی اور امن کا تسلسل برقرار رکھنا فوج کی اولین ترجیح ہے۔
لیفٹیننٹ جنرل احمد شریف چوہدری نے نوجوانوں کو مخاطب کرتے ہوئے کہا کہ نوجوان نسل ہی قوم کے روشن مستقبل کی ضمانت ہے، اور ملکی ترقی و استحکام میں ان کا کردار انتہائی اہمیت رکھتا ہے۔
