کراچی سے موصولہ اطلاعات کے مطابق پاکستان انٹرنیشنل ایئرلائنز (پی آئی اے) کے تقریباً 16 ہزار ریٹائرڈ ملازمین کو ستمبر کی پنشن تاحال ادا نہیں کی جا سکی، جس کے باعث سابقہ عملے میں شدید تشویش اور بے چینی پائی جا رہی ہے۔ پنشن کی عدم ادائیگی پر پی آئی اے ریٹائرڈ ملازمین ایسوسی ایشن کے صدر سید طاہر حسین نے بتایا کہ متعدد بار کمپنی سیکریٹری اور چیف فنانس افسر سے رابطہ کیا گیا، مگر کوئی واضح جواب نہیں ملا۔ ان کے مطابق، پنشن کی عدم فراہمی سے ریٹائرڈ ملازمین مالی مشکلات کا شکار ہیں اور ان کے گھریلو اخراجات بری طرح متاثر ہو رہے ہیں۔ ذرائع کا کہنا ہے کہ ان ریٹائرڈ ملازمین کی پنشن کی ذمہ داری پی آئی اے ہولڈنگ کمپنی کے ذمے ہے، تاہم کمپنی کے سی ای او اسد رسول نے اس حوالے سے کسی قسم کا ردِعمل دینے سے گریز کیا ہے۔ ریٹائرڈ ملازمین نے حکومتِ پاکستان سے مطالبہ کیا ہے کہ فوری طور پر پنشن کی ادائیگی ممکن بنائی جائے تاکہ سینکڑوں خاندان مزید مالی بحران سے بچ سکیں۔