سوشل میڈیا پر اسلام آباد کی مارگلہ ہلز کی بلند ترین چوٹی ٹلہ چرونی پر برفباری سے متعلق افواہیں گردش کر رہی ہیں، جن میں دعویٰ کیا جا رہا ہے کہ 31 دسمبر 2025 کی رات سے 2 جنوری 2026 کی صبح تک علاقے میں برفباری یا ژالہ باری ہو سکتی ہے۔
ان غیر مصدقہ اطلاعات کے مطابق ممکنہ گرج چمک کے ساتھ بارش کے باعث شدید ژالہ باری یا گیلی برف پڑنے کا امکان ظاہر کیا جا رہا تھا، جس سے درجہ حرارت میں نمایاں کمی ہو سکتی تھی۔
ٹلہ چرونی، جو سطح سمندر سے تقریباً 1604 میٹر (5262 فٹ) بلند ہے، مارگلہ ہلز نیشنل پارک کا حصہ ہے اور اسلام آباد کے مضافات میں واقع ہے۔ تاہم، پاکستان محکمہ موسمیات (PMD) نے ان تمام دعوؤں کو محض افواہیں قرار دیتے ہوئے واضح کیا ہے کہ آئندہ دنوں میں مارگلہ ہلز پر برفباری کا کوئی امکان نہیں۔
محکمہ موسمیات کے مطابق اس وقت علاقے میں کم سے کم درجہ حرارت تقریباً 3 ڈگری سینٹی گریڈ ریکارڈ کیا جا رہا ہے، جبکہ برفباری کے لیے درجہ حرارت کا نقطہ انجماد یعنی 0 ڈگری یا اس سے کم ہونا ضروری ہوتا ہے۔
محکمہ موسمیات نے شہریوں اور سیاحوں کو ہدایت کی ہے کہ وہ موسم سے متعلق معلومات کے لیے غیر مصدقہ سوشل میڈیا رپورٹس پر انحصار کرنے کے بجائے سرکاری ذرائع اور مستند موسمی اپ ڈیٹس کو ترجیح دیں، خصوصاً سردیوں کے موسم میں جب پہاڑی علاقوں کے حالات تیزی سے بدل سکتے ہیں۔
