اسلام آباد: سعودی عرب نے پاکستان کے کارپوریٹ فارمنگ سیکٹر میں گہری دلچسپی کا اظہار کرتے ہوئے خصوصاً چاول کی پیداوار کے شعبے میں سرمایہ کاری کی خواہش ظاہر کی ہے۔ اس اقدام کا مقصد معیاری اور قابلِ بھروسہ زرعی اجناس کی مستقل فراہمی کو یقینی بنانا ہے، تاکہ طویل المدتی بنیادوں پر مملکت کو چاول کی برآمدات ممکن بنائی جا سکیں۔
اسلام آباد میں ہونے والے ایک اعلیٰ سطحی اجلاس میں وفاقی وزیر تجارت جام کمال خان کی ملاقات سعودی عرب کے اسسٹنٹ وزیر سرمایہ کاری انجینئر ابراہیم المبارک سے ہوئی۔ ملاقات میں دوطرفہ تجارت اور سرمایہ کاری کے فروغ پر تفصیلی تبادلہ خیال کیا گیا۔ فریقین نے اس بات پر اتفاق کیا کہ شراکت داری کا ایسا ماڈل اپنایا جائے گا جو مسابقت، پیداوار میں وسعت اور ویلیو چین کو مضبوط بنانے پر مبنی ہو۔
اجلاس میں اس امر پر زور دیا گیا کہ پاکستان کی زرعی پیداوار کی صلاحیت اور سعودی عرب کے مالی وسائل اور علاقائی منڈیوں تک رسائی باہمی تعاون کے لیے مضبوط بنیاد فراہم کرتے ہیں۔ چاول کے علاوہ کپاس، چارہ، گوشت اور دیگر زرعی اجناس کی کارپوریٹ فارمنگ میں بھی تعاون کو وسعت دینے پر غور کیا گیا، جبکہ برآمدات پر مبنی زرعی منصوبوں کے لیے سعودی مالی معاونت کے امکانات بھی زیرِ بحث آئے۔
انسانی وسائل کی ترقی کے حوالے سے بھی گفتگو ہوئی، جس میں سعودی عرب نے صحت، مہمان نوازی اور تکنیکی خدمات کے شعبوں میں ووکیشنل ٹریننگ پروگرامز کے لیے مہارت فراہم کرنے کی پیشکش کی۔ علاوہ ازیں تعمیراتی سامان، ادویہ سازی، اسپورٹس گڈز اور لائٹ مینوفیکچرنگ سمیت دیگر شعبوں میں مشترکہ منصوبوں اور نجی شعبے کے اشتراک کو فروغ دینے پر بھی اتفاق کیا گیا۔
اجلاس میں آئندہ مختلف شعبوں سے متعلق ورکشاپس اور بزنس ٹو بزنس ملاقاتوں کے انعقاد کا اعلان بھی کیا گیا، تاکہ پالیسی سطح کے مذاکرات کو عملی تجارت، سرمایہ کاری اور روزگار کے مواقع میں تبدیل کیا جا سکے۔ یہ تعاون پاکستان اور سعودی عرب کے بڑھتے ہوئے اقتصادی تعلقات کا عکاس ہے، جس میں کارپوریٹ فارمنگ سیکٹر آئندہ برآمدی ترقی میں اہم کردار ادا کرے گا۔
