اسلام آباد: بیورو آف امیگریشن اینڈ اوورسیز ایمپلائمنٹ (BEOE) نے پاکستانی شہریوں کو ایک بار پھر خبردار کیا ہے کہ وہ ایسے نجی ٹریول ایجنٹس کے جھانسے میں نہ آئیں جو بیرونِ ملک روزگار دلانے یا ویزا فراہم کرنے کے دعوے کرتے ہیں، کیونکہ ان کا غیر ملکی ملازمتوں میں کوئی قانونی کردار نہیں۔

بیورو کے مطابق، ایسے ایجنٹس کو ویزا یا جاب پروسیسنگ کے نام پر کسی قسم کی رقم وصول کرنے کا اختیار نہیں۔ پاکستان سے قانونی طور پر صرف وہی افراد بیرونِ ملک بھرتی کر سکتے ہیں جو لائسنس یافتہ اوورسیز ایمپلائمنٹ پروموٹرز (OEPs) ہوں، جن کی تصدیق بیورو کی سرکاری آن لائن ڈائریکٹری سے کی جا سکتی ہے۔

“آزاد ویزا” کی حقیقت— کوئی ملک مکمل فری ایمپلائمنٹ ویزا نہیں دیتا

متعدد شہریوں میں پھیلی غلط فہمی کو دور کرتے ہوئے BEOE نے واضح کیا ہے کہ دنیا کا کوئی ملک ایسا ویزا جاری نہیں کرتا جو ہولڈر کو مکمل آزادانہ طور پر کسی بھی جگہ کام کرنے کی اجازت دے۔

ہر قانونی ورک ویزا:

کسی ایک اسپانسر یا آجر سے منسلک ہوتا ہے

ملازم کو اسی اسپانسر کے تحت کام کرنا ہوتا ہے

اسپانسر تبدیل کرنے کے لیے سرکاری اجازت لازمی ہے

بغیر اجازت اسپانسر تبدیل کرنے پر:

بھاری جرمانہ

ڈی پورٹ

یا قانونی حقوق کا خاتمہ
جیسے نتائج سامنے آ سکتے ہیں۔

“اوپن” یا “فری” ویزے— عوام کو دھوکہ دینے کا ہتھکنڈہ

بیورو نے خبردار کیا ہے کہ کھلے، فری یا ٹرانسفرایبل ویزے پیش کرنے کے زیادہ تر دعوے محض فراڈ ہوتے ہیں۔ ایسے جھوٹے وعدوں کے ذریعے سادہ لوح پاکستانیوں سے بھاری رقوم بٹوری جاتی ہیں۔

بیورو کے مطابق:

اگر کوئی شخص کنٹریکٹ کے علاوہ کہیں اور کام کرتا ہے تو یہ غیر قانونی ملازمت تصور ہوتی ہے

ورک پلیس پر حادثے یا چوٹ کی صورت میں صرف اصل اسپانسر/آجر ہی ذمے دار ہوتا ہے

غیر رجسٹرڈ ایجنٹس کے ذریعے جانے والوں کو کسی قانونی تحفظ کی ضمانت نہیں ملتی

عوام کے نام پیغام

BEOE نے تمام پاکستانیوں سے اپیل کی ہے کہ وہ بیرونِ ملک روزگار کے لیے صرف رجسٹرڈ اوورسیز ایمپلائمنٹ پروموٹرز سے رابطہ کریں، کسی غیر قانونی ایجنٹ کو پیسے نہ دیں اور “آزاد ویزا” جیسے دھوکے کا شکار نہ ہوں۔