میچ کے دوران راولپنڈی کرکٹ اسٹیڈیم کو گلابی رنگ میں سجایا جائے گا اور پاکستان اور جنوبی افریقہ کی ٹیمیں تین ٹی 20 میچز کی سیریز کے پہلے میچ میں گلابی تھیم کے ساتھ کھیلیں گی۔ پاکستان کرکٹ بورڈ نے "پنک ربن پاکستان" کے ساتھ شراکت داری کرتے ہوئے اس اقدام کا مقصد عوام میں چھاتی کے سرطان کے بارے میں شعور اجاگر کرنا بتایا ہے۔ میچ میں پاکستان کی ٹیم خصوصی گلابی کٹ پہن کر میدان میں اترے گی جبکہ جنوبی افریقہ کے کھلاڑی، میچ آفیشلز، کوچنگ اسٹاف اور کمنٹیٹرز بھی گلابی ربن پہنیں گے۔ سٹمپس اور دیگر میچ کے عناصر بھی گلابی رنگ کے ہوں گے۔ نشریات کے دوران کمنٹیٹرز ناظرین کو آگاہی پیغامات بھی دیں گے تاکہ بیماری کے بارے میں شعور عام ہو۔ اس کے علاوہ لاہور میں پنک ربن بریسٹ کینسر ٹرسٹ اسپتال خواتین کے لیے مفت کلینیکل معائنہ اور سکریننگ کی سہولت فراہم کرے گا تاکہ زیادہ سے زیادہ خواتین بروقت تشخیص اور علاج کے بارے میں آگاہ ہو سکیں۔ پی سی بی کے چیف آپریٹنگ آفیسر نے کہا کہ یہ اقدام بورڈ کے سماجی ذمہ داری کے عزم کی عکاسی کرتا ہے اور امید ہے کہ مشترکہ کوششوں سے معاشرے میں آگاہی پھیلانے میں مدد ملے گی۔ پنک ربن پاکستان کے چیف ایگزیکٹیو آفیسر نے کہا کہ کرکٹ جیسے کھیل کے ذریعے اس اہم سماجی پیغام کو ملک بھر میں پہنچانا ایک مثبت اور قابل تعریف اقدام ہے۔